Presentación do libro: Senderos de la Historia. Miradas y actores en medio siglo de historia rural

 

Hoxe, martes 12 de xaneiro de 2021 terá lugar a presentación do libro Senderos de la Historia, froito do encontro celebrado en Santiago de Compostela sobre historia agraria en xaneiro de 2019. Está coordinado polos membros de HISTAGRA Alba Díaz-Geada e Lourenzo Fernández Prieto, e nel participan os máis recoñecidos historiadores de España sobre a temática agraria, agroecoloxía e historia rural.

 

Este traballo ten como punto de partida, obxectivo e resultado, o debate, na mellor tradición do orixinal Seminario de Historia Agraria (SEHA), hoxe a Sociedade para os Estudos de Historia Agraria. No debate académico están os seus fundamentos, que o vinculan a outros exercicios reflexivos anteriores, e no debate colectivo está a coherencia do seu contido. A cuestión é a Historia Agraria das Españas como problema, no último medio século. Os obxectos de discusión son os cambios nos enfoques, métodos e temas analizados pola Historia Agraria ao longo dos tempos modernos e da contemporaneidade. A primeira metade do libro está dedicada á reflexión sobre como o estudo histórico da propiedade no contexto da revolución burguesa deu orixe á renovación historiográfica nos anos setenta. A segunda metade trata de diferentes liñas de investigación desenvolvidas pola historiografía agraria ao longo de catro décadas: historia económica, estudo das comunas, historia ambiental, atención ao cambio tecnolóxico, historia política e a acción colectiva no mundo rural, o vínculo coa historia social e cultural, o estudo das actitudes sociais e a relación coa historia das migracións.

 

Ademais, a presentación da publicación, realizarase un recoñecemento ao profesor Ramón Villares Paz, mestre de historiadores  aproveitando o seu 70 cumpreanos.

 

Data: 12 de xaneiro de 2021                                      Hora: 12 da mañá

Lugar: Paraninfo da USC                                              Organiza: HISTAGRA-USC e Dpt. Historia-USC